Vastaus aiheeseen: yhteiskäyttö, yhteiskäyttöinen

Kundividi estas kurioza esprimo. Ju pli mi trovas ekzemplojn kiel ĝi estas uzata, des pli mi konvinkiĝas, ke tia vorto estas bezonata en Esperanto.

Ĝi ne aperas en vortaroj, almenaŭ ne en tiuj vortaroj, kiujn mi povas facile konsulti ekz. PIV, Revo, Suomi-Esperanto-Suomi aŭ Ordbok Svenska-Esperanto.

En Tekstaro (https://www.tekstaro.com/) tamen ĝi aperas centojn da fojoj, plej ofte en Le Monde Diplomatique, dekojn da fojoj ankaŭ en aliaj prestiĝaj eldonaĵoj kiel Revuo Esperanto, Kontakto, Monato.

Laŭ Tekstaro ĝi aperis unuafoje en 1984 en verko Ombro sur interna pejzaĝo, de Spomenka Štimec. Alia aŭtoro, kiu uzis ĝin, estas Anna Löwenstein en La memoraĵoj de Julia Agripina.

Ekzemploj el Revuo Esperanto:
partnero de la Universitato, la financan ŝarĝon kundividas Esperanto Nederland, kiu ĝis nun
klarigitaj en la japana, ekz. car-sharing = kundivido de aŭto, komuna aŭtoluado.
Kun Zilah, pli ol kun aliaj aŭtoroj, li aparte kundividas la altiriĝon al orient-aziaj filozofioj
respekton, kunlaboron en deĵorteamo kaj justan kundividon de la rimedoj (akvo, nutraĵoj, energifon

Ĝi estas ofte uzata ankaŭ en figura senco kundividi pensojn, opiniojn, sentojn ktp.
Ĉar verŝajne ne multaj kundividas mian opinion, mi prezentos ĝin ĉi tie.
Ili estas forumo, kie amerikanoj povas kundividi spertojn, pritaksi sian agadon kaj
Ĉu vi havas sperton pri amo, kiun vi ŝatus kundividi? Verku por Kontakto!

Oni povas facile trovi ekzemplojn ankaŭ en interreto:

La komerca modelo de Uber baziĝas sur la principoj de kundivida ekonomio. La kompanio distribuas poŝtelefonan aplikaĵon, kiu ebligas kontakton inter ŝoforoj kaj eblaj pasaĝeroj. (el https://eo.wikipedia.org/wiki/Uber)

Povos esti necese, ke ni kundividos viajn personajn informojn kun la jenaj triaj partioj (el retejo de KAEST Konferenco pri Aplikoj de Esperanto en Scienco kaj Tekniko https://kaest.ikso.net/2024/privateco/)