Kalenterit

1-a de Aŭgusto 1945. Forpasas Blas Cabrera, konsiderata unu el la patroj de la hispana fiziko kaj referenco en la kampo de magnetismo.

2-a de Aŭgusto 1893. Naskiĝas kristalografo Isabel Ellie Knaggs. Ŝi establis ke karbonatomoj alprenas geometrion en kvaredra formo kiam ili formas komponaĵojn kun aliaj atomoj.

3-a de Aŭgusto 1890. Naskiĝas astronomo Martha Betz Shapley. Ŝi estas konata pro sia esplorado pri eklipsantaj binaraj steloj.

4-a de Aŭgusto 1917. Inventisto Lucien Lévy prezentas patento-peton por la superheterodina principo. Ĝi estos tiel grava, ke preskaŭ ĉiuj AM-radioriceviloj uzos la heterodinan sistemon.

5-a de Aŭgusto 1952. Forpasas Sameera Moussa, la unua atomfizikisto de Egiptujo. Ŝi laboris por igi la medicinan uzon de nuklea teknologio alirebla por ĉiuj kaj por la paca uzo de atomenergio.

6-a de Aŭgusto 1773. Naskiĝas matematikisto Louis Benjamin Francoeur. Lia kurso pri algebro en la Pariza fakultato de sciencoj inkludis lecionojn pri geodezio kaj probablo-kalkulo.

7-a de Aŭgusto 1933. Naskiĝas politikologo Elinor Ostrom. Kune kun Oliver Williamson, al ŝi estis aljuĝita la Nobel-honora premio pro iliaj teorioj pri la rolo de entreprenoj en konfliktsolvado kaj kiel regstrukturoj.

8-a de Aŭgusto 2013. Forpasas arabisto kaj hispanisto Mahmud Ali Makki. Li kreis la Sekcion de Hispana Lingvo kaj Literaturo en la universitato de Kairo. Inter aliaj premioj, li ricevis la Ordenon de Alfonso X la Saĝulo.

9-a de Aŭgusto 1937. Naskiĝas kemiisto Edda Adler. Ŝi studis la faktorojn kaj mekanismojn regantajn la liberigon de neŭrotransmisiloj, kaj la rolon de la endokanabinoida sistemo en korvaskula fiziopatologio.

10-a de Aŭgusto 1883. Naskiĝas agronomo kaj plantfiziologo Winifred Elsie Brenchle. Ŝi plibonigis la teknikon de hidroponia kultivado kaj alproksimiĝis al malkovro de la rolo de kupro kaj zinko en plantnutrado.

11-a de Aŭgusto 1942. Inĝeniero kaj aktorino Hedy Lamarr kaj pianisto George Antheil patentas sian ĉifritan komunikadsistemon. Ĝi konsistigas unu el la bazoj por la disvolviĝo de vifio.

12-a de Aŭgusto 1865. Joseph Lister iĝas la unua kirurgo kiu uzis desinfektaĵon dum operacio.

13-a de Aŭgusto 1642. Christiaan Huygens malkovras la sudpolusan glacitavolon de Marso.

14-a de Aŭgusto 1888. Naskiĝas matematikisto Julio Rey Pastor. Li estas konsiderata unu el la grandaj novigantoj de matematiko en la hispanlingva mondo.

15-a de Aŭgusto 1863. Naskiĝas ŝipinĝeniero kaj matematikisto Aleksej Krilov. Li publikigis proksimume 300 verkojn pri ŝipkonstruado, magnetismo, artilerio, matematiko, astronomio kaj geodezio.

16-a de Aŭgusto 1871. Naskiĝas biologo kaj limnologo Rina Monti. Fakulo pri histologio kaj kompara anatomio, ŝi evoluigis la italan skolon de limnologio (akvejoscienco). Ŝi estis la unua katedra profesorino en la Reĝlando de Italio.

17-a de Aŭgusto 2018. Estas publikigata la genaro de ordinara tritiko. Ĝia granda komplekseco necesigis la kunlaboron de 73 esplorinstitutoj el 20 landoj, inkluzive de INRA kaj CNRS (Francio) kaj CSIC (Hispanio).

18-a de Aŭgusto 1911. Naskiĝas pioniro pri programado Klára Dán Von Neumann. Ŝi skribis la kodon uzitan en la maŝino MANIAC I, evoluigita de matematikisto John von Neumann kaj inĝeniero Julian Bigelow.

19-a de Aŭgusto 1874. Naskiĝas fungologo kaj botanikisto Arthur Henry Reginald Buller. Li estis konata esploristo de la regno Fungi kaj de la tritika rusto.

20-a de Aŭgusto 1942. Atomkemiistoj Burris Cunningham kaj Louis Werner izolas unu mikrogramon da plutonio. Ĝi estis la unua kvanto videbla por la homa okulo, kio ebligis studi kelkajn el ĝiaj ecoj.

21-a de Aŭgusto 1789. Naskiĝas Augustin Louis Cauchy, unu el la pioniroj de matematika analizo.

22-a de Aŭgusto 1860. Naskiĝas Blanca Catalán de Ocón y Gayolá. Ŝi estas konsiderata la unua hispana botanikistino. Ŝiaj herbarioj, el kiuj du estas daŭre konservataj, inkludis speciojn tiutempe nekonatajn.

23-a de Aŭgusto 1917. Naskiĝas endokrinologo Estelle Rosemary Ramey. Ŝi refutis kirurgon Edgar Berman, kiu asertis ke virinoj ne povis plenumi altan publikan oficon pro siaj malagrablaj hormonaj malekvilibroj.

24-a de Aŭgusto 2021. Parto de la Robotika Teamo de Afganaj Knabinoj alvenas en Meksikon fuĝante de la talibanoj. Ili estas konataj pro evoluigado de malmultekosta ventolila prototipo dum la pandemio de COVID-19.

25-a de Aŭgusto 1609. Galileo Galilei prezentas la unuan astronomian teleskopon registritan antaŭ la Senato de Venecio.

26-a de Aŭgusto 1892. Naskiĝas kriptoanalizisto Elizebeth Smith Friedman. Ŝi laboris kontraŭ kontrabando kaj drogŝakrado kaj malĉifris mesaĝojn de naziaj spionoj stimulantaj faŝismajn ribelojn en Sudameriko.

27-a de Aŭgusto 1923. Naskiĝas genetikisto Liane Russell. Ŝi studis la genetikon de mamuloj por kompreni la determinon de sekso kaj la efikojn de radiado, medikamentoj kaj fueloj.

28-a de Aŭgusto 1789. William Herschel malkovras Enceladon, sateliton de Saturno. Krom astronomo, Herschel estis muzikisto kaj komponis verkojn por klavaro, violono, hobojo kaj orkestro.

29-a de Aŭgusto 1982. La kemia elemento mejtnerio estas sintezita por la unua fojo fare de esplorteamo gvidata de Peter Armbruster kaj Gottfried Münzenberg. Ĝi ricevas sian nomon omaĝe al Lise Meitner.

30-a de Aŭgusto 1884. Naskiĝas fizikisto kaj kemiisto Theodor Svedberg. Li evoluigis la teknikon de analiza ultracentrifugado kaj montris ĝian utilecon en distingado de puraj proteinoj.

31-a de Aŭgusto 1842. Naskiĝas kuracisto kaj verkisto Mary Corinna Putnam. Ŝi pledis por la vastigo de edukaj ŝancoj por virinoj, kiuj devus ricevi la saman trejnadon kaj klinikan praktikon kiel viroj.

1-a de Septembro 1145. Naskiĝas geografo kaj verkisto Ibn Jubair. La libro rakontanta lian pilgrimadon el la Iberia duoninsulo ĝis Mekko estas valora fonto de scio pri lia tempo.

2-a de Septembro 1877. Naskiĝas kemiisto Frederick Soddy. Li ricevis la Nobelpremion pri Kemio pro siaj studoj pri radioaktivaj substancoj kaj liaj esploroj pri la origino kaj naturo de izotopoj.

3-a de Septembro 1897. Naskiĝas fizikisto Elisabeta Karamiĥajlova, unu el la pioniraj virinoj en nuklea fiziko komence de la 20-a jarcento; ŝi kunlaboris kun Marietta Blau en la studado de polonio.

4-a de Septembro 973. Naskiĝas matematikisto kaj astronomo Al-Biruni. Li kalkulis la radiuson de la tera sfero kun ekarto de nur 17 km, nivelo de alproksimiĝo kiu ne ripetiĝus ĝis la 16-a jarcento.

5-a de Septembro 1897. Naskiĝas botanikisto Katherine Warington. Ŝi estis la unua homo, kiu pruvis ke boro, en formo de borata acido, estas esenca por la kreskado de plantoj.

6-a de Septembro 1829. Naskiĝas pionira kuracisto Marie Zakrzewska. Kune kun Elizabeth kaj Emily Blackwell, ŝi fondis flegist-lernejon por virinoj, de kiu ŝi estis intendanto.

7-a de Septembro 1829. Naskiĝas August Kekulé. Li estis unu el la fondintoj de la struktura teorio de kemio, bazita sur la tetravalenco de la karbonatomo kaj sur la koncepto de kemia ligo.

8-a de Septembro 1987. Forpasas la iĥtiologo Margaret M. Smith. Kune kun sia edzo, ŝi malkovris 370 speciojn de fiŝoj. Krome, ŝi estas konsiderata unu el la plej gravaj ilustristoj pri naturo en la mondo.

9-a de Septembro 1916. Naskiĝas geologo Dorothy Jung Echols. Ŝi laboris en la naftoindustrio pri la Projekto de Borado de Profunda Maro. Ŝi specialiĝis pri mikrofosilioj (mikropaleontologio).

10-a de Septembro 1907. Naskiĝas geologo kaj koralspecialisto Dorothy Hill. Ŝi estis la unua profesorino en aŭstralia universitato, kaj ankaŭ la unua prezidantino de la Aŭstralia Akademio de Scienco.

11-a de Septembro 1847. Naskiĝas astronomo Mary Watson Whitney. Ŝi lernis de Maria Mitchell kaj, dum 22 jaroj, estis direktoro de la Observatorio Vassar. Sub ŝia direktado estis publikigitaj 102 sciencaj artikoloj.

12-a de Septembro 1921. Naskiĝas la verkisto de scienc-fikcio Stanisław Lem. Liaj libroj esploras la rolon de la homaro en la universo kaj ĝiajn limojn, inkluzive de komunikadproblemoj kun aliaj estaĵoj.

13-a de Septembro 1913. Naskiĝas kemiisto Carmen Herrero Ayllón. Krom esploristo kaj profesoro pri kemio, ŝi partoprenis en projekto de pedagogia laboratorio por instruista trejnado en ĉiuj kampoj.

14-a de Septembro 2016. La astrofizikisto Begoña Vila Costas estas agnoskita per la medalo je Escepta Publika Atingo de NASA pro elstara atingo en la evoluigo de la kosmoteleskopo James Webb.

15-a de Septembro 2019. Forpasas Montserrat Soliva Torrentó. Ŝi estis specialisto pri kompoŝtado kaj pri la uzo de organikaj reziduoj por konservi la medion, protekti la grundon kaj pliigi agrikulturan produktivecon.

16-a de Septembro 1934. Juan de la Cierva faras la unuan flugon per aŭtogiro super la urbo Madrido.

17-a de Septembro 1888. Naskiĝas agronomisto kaj biokemiisto Michiyo Tsujimura. En 1929 ŝi izolis kateĥinon (tipo de flavonoido) kaj en 1930 ŝi ekstraktis taninon en kristala formo el verda teo.

18-a de Septembro 1977. La kosmosondilo Voyager 1 faris la unuan foton de la Luno kaj la Tero kune en la spaco.

19-a de Septembro 2021. Je la horo 15:03 ek-erupcias la vulkano Tajogaite (en la kanaria insulo La Palma). La teamo de drone-pilotoj de la IGME (Instituto pri Geologio kaj Minindustrio de Hispanio) faris pioniran laboron en la mastrumado de la vulkana krizo kaj la monitorado de la erupcio.

20-a de Septembro 1959. Naskiĝas biokemiisto Elisa Izaurralde. Ŝi studis la proteinojn kiuj eksportas mesaĝan RNA ekster la ĉelan kernon, la mekanismojn de mova reteno, kaj la kadukiĝon de mesaĝa RNA.

21-a de Septembro 1923. Forpasas la kuracisto Fidel Pagés, pioniro de epidurala anestezo. Pro lia frua morto kaj la fakto ke lia laboro ne estis tradukita, liaj eltrovaĵoj restis nekonataj dum jaroj.

22-a de Septembro 1908. Naskiĝas astronomo Odette Bancilhon. Ekde la fruaj 1930-aj jaroj ŝi disvolvis sian karieron ĉe la Observatorio de Alĝero, kie ŝi malkovris la asteroidon Cevenola (1333) en 1934 .

23-a de Septembro 2013. Forpasas botanikisto kaj limnologo Ruth M. Patrick. Specialisto pri diatomeoj, ŝi estis pioniro en uzado de tiuj organismoj por diagnozi la sanstaton de dolĉakvaj ekosistemoj.

24-a de Septembro 2013. Por la unua fojo oni aŭdas nehomajn primatojn flustri. Ili estis titioj kiuj, kiam sentante sin minacataj, flustris por eviti esti aŭdataj de aliaj.

25-a de Septembro 1644. Naskiĝas astronomo Ole Rømer. Pro lia influo, la gregoria kalendaro estis akceptita en Danlando en 1710.

26-a de Septembro 2008. Forpasas la arkitekto Rita Fernández Queimadelos. Ŝi tenis postenojn neniam antaŭe okupitajn fare de virino en Hispanio, kiel ekzemple municipa arkitekto aŭ provinca lernejarkitekto.

27-a de Septembro 2013. La Usona Administracio pri Manĝaĵoj kaj Medikamentoj (FDA) aprobas la unuan artefaritan pankreaton.

28-a de Septembro 1954. Naskiĝas paleoantropologo Juan Luis Arsuaga, kunmalkovrinto de la kranio n-ro 5 (konata kiel Miguelón) ĉe la Sima de los Huesos (Kaverno de la Ostoj, en Atapuerca, Hispanio). Ekde 2013 li estas scienca direktoro de la Muzeo pri Homa Evoluo en la urbo Burgoso.

29-a de Septembro 1896. Naskiĝas mar-biologo Irene Bernasconi. Fakiĝinta pri la serĉo de ekinodermoj, ŝi estas konata pro sia laboro en Antarkto, precipe en la Argentina Antarkta Sektoro.

30-a de Septembro 1958. Laboristoj malkovras en Camas (provinco Sevilo en Hispanio) la trezoron de la Carambolo. Ĝi estas unu el la plej gravaj eltrovoj ligitaj al la Tarteza mondo.

1-a de Oktobro 2015. Okazas la unua elsendo de Longitud de onda (Ondolongo), programero de la hispana radiostacio Radio Clásica, dediĉita al la rilato inter scienco kaj muziko.

2-a de Oktobro 1928. Piedad de la Cierva Viudes eniras kiel studento en la Universitaton de Murcio. Ŝi estis la sola virino. Ŝi pioniris la studadon de optika vitro kaj inventis fajr-rezistajn brikojn el riz-ŝelo.

3-a de Oktobro 1509. Antonio de Nebrija okupas la katedron de Retoriko ĉe la Universitato de Salamanko. Li estas unu el la plej elstaraj lingvistoj de la kastilia lingvo. Li verkis la unuan gramatikon de tiu ĉi lingvo en 1492.

4-a de Oktobro 1890. Naskiĝas la kuracisto kaj radiologo Alan L. Hart. Li estis pioniro en la apliko de ikso-radioj por diagnozi tuberkulozon. Li faris la unuan transseksan viran transiron dokumentitan en Usono.

5-a de Oktobro 1925. Naskiĝas paleoantropologo Emiliano Aguirre. Li estris la elfosadojn de la pleistocenaj kuŝejoj en Atapuerca, Hispanio, de 1978 ĝis sia emeritiĝo en 1990.

6-a de Oktobro 1903. Naskiĝas fizikisto Ernest Walton. Kune kun John Cockcroft, li konstruis unu el la unuaj specoj de partikloakceliloj, pro kio ili gajnis la Nobel-premion.

7-a de Oktobro 1928. Naskiĝas psikiatro Lorna Wing. La triopo de Wing, kiu difinas la simptomojn de la sindromo de Asperger, estas nomata laŭ ŝi.

8-a de Oktobro 2023. Internacia Tago de Podologio. Ĝia celo estas levi konscion pri la graveco de pieda sano por la tutkorpa sano.

9-a de Oktobro 2013. Nova mikroskopa metodo ebligas observi strukturojn ĝis 80 nm ene de ĉelo.

10-a de Oktobro 1731. Naskiĝas Henry Cavendish, fizikisto, kemiisto kaj malkovrinto de hidrogeno (atoma numero 1 en la perioda tabelo).

11-a de Oktobro 1745. Ewald Georg von Kleist konstruas la Lejdenan botelon, la unuan mekanismon por stoki elektran ŝargon.

12-a de Oktobro 1946. Estas fondita la Instituto de Endokrinologio C. I. Parhon de Bukareŝto. Constantin Ion Parhon estis kunaŭtoro, kun Moise Goldstein, de la verko kiu estas konsiderata kiel la unua disertaĵo de la mondo pri medicina endokrinologio.

13-a de Oktobro 1874. Naskiĝas Kiyotsugu Hirayama (Kijocugu Hirajama). Li malkovris grupojn de asteroidoj kun similaj orbitaj trajtoj kiel granda duonakso, ekscentreco kaj klinangulo. La tielnomataj Hirajamaj familioj verŝajne havas komunan originon.

14-a de Oktobro 1803. Estas publikigita la dekreto en kiu flegistino Isabel Zendal Gómez estas aligita al la Reĝa Filantropia Ekspedicio por Vakcinado (kontraŭ variolo).

15-a de Oktobro 1608. Naskiĝas fizikisto Evangelista Torricelli. Li estas konsiderata la unua homo kiu mezuris atmosferan premon.

16-a de Oktobro 2013. La robotveturilo Curiosity vojaĝis 1 kilometron ekde sia surteriĝo, per kio ĝi atingis mejloŝtonon en sia vojaĝo en Marso.

17-a de Oktobro 1720. Naskiĝas verkisto y anatomisto Geneviève Charlotte Thiroux d’Arconville. Ŝi faris multajn eksperimentojn pri putriĝo kaj konservado de manĝaĵoj, kiujn ŝi kolektis en eseo en 1766.

18-a de Oktobro 1963. La katino Félicette iĝas la unua feliso vojaĝanta en la spacon. Tiu ĉi misio estis mejloŝtono en la kosmovetkuro de Francio.

19-a de Oktobro 1943. Oni izolas en Universitato Rutgers (Usono) la unuan efikan antibiotikon kontraŭ tuberkulozo: streptomicino.

20-a de Oktobro 1906. Lee De Forest anoncas la eltrovon de la triodo, kiu plifortigis sonondojn kaj kontrolis laŭtecon. Ĝi estas antaŭulo de la amplifilo uzata en elektraj gitaroj.

21-a de Oktobro 2016. Winifred Mary Beard, spertulo pri la studo de la romia civilizacio, ricevas la Premion Princino de Asturio. Ŝia granda disvastiga laboro ebligis alproksimigi la klasikaĵojn al la ĝenerala publiko.

22-a de Oktobro 1981. Oni inaŭguras la altrapidan trajnon Parizo-Liono, la unuan tian en Eŭropo.

23-a de Oktobro 2013. Oni malkovras la plej malproksiman detekteblan galaksion ĝis nun (z8_GND_5296). Ĝi foras 13,1 miliardojn da lumjaroj de ni.

24-a de Oktobro 1997. La esplorteamo de Atapuerca (Hispanio) ricevas la Premion Princo de Asturio por Scienca kaj Teknika Esploro. Tiel estas rekonita la eksterordinara intereso de iliaj paleoantropologiaj eltrovaĵoj .

25-a de Oktobro 1972. Naskiĝas ekonomikisto Esther Duflo. Ŝi ricevis la Nobelpremion pri Ekonomiko en 2019 (kune kun Abhijit Banerjee kaj Michael Kremer) pro sia eksperimenta aliro al mildigado de tutmonda malriĉeco.

26-a de Oktobro 1874. Naskiĝas fizikisto-kemiisto Thomas Lowry. Li plilarĝigis la teorion de Arrhenius difinante acidon kiel substancon kapablan transdoni protonojn kaj bazon kiel substancon kapablan akcepti ilin.

27-a de Oktobro 925. Ebla dato de forpaso de Abū Bakr Muhammad ibn Zakarīyā al-Rāzī (al-Razi). Li verkis la medicinan enciklopedion al-Hawi kaj estas konsiderata la eltrovinto de keroseno, de la sulfata acido kaj de la medicina uzo de etanolo.

28-a de Oktobro 1982. La Usona Administracio pri Manĝaĵoj kaj Medikamentoj (FDA) aprobas la merkatigon de la unua rekombina medicina produkto: speco de insulino (Humulin).

29-a de Oktobro 2015. Forpasas María Luisa Aguilar Hurtado, la unua profesia astronomo en Peruo. Ŝi antaŭenigis sciencan kulturon fondante la Seminarion pri Astronomio kaj Astrofiziko.

30-a de Oktobro 1938. Naskiĝas matematikisto Marina Jevsejevna Ratner. Specialisto pri ergoda teorio, pluraj teoremoj de ĉi tiu branĉo portas ŝian nomon.

31-a de Oktobro 2003. Dum rutinaj observadoj, oni detektas la nanan planedon Eriso. Ĝi estis identigita en januaro 2005 kaj instigis la Internacian Astronomian Union redifini la esprimon planedo en 2006.

1-a de Novembro 1973. La esploristoj Cohen, Chang, Boyer kaj Helling publikigas la unuan en-vitran konstruadon de plasmidoj, kio estas decida mejloŝtono en rekombina DNA-teknologio.

2-a de Novembro 1815. Naskiĝas matematikisto George Boole. Li estas konsiderata la kreinto de matematika logiko.

3-a de Novembro 1906. Naskiĝas farmacia kemiisto Luz Oliveros-Belardo. Ŝi ĉerpis pli ol tridek novajn filipinajn esencajn oleojn, studis iliajn kemiajn trajtojn kaj kreis novajn gustojn, aromojn kaj medikamentojn.

4-a de Novembro 1897. Naskiĝas botanikisto Janaki Ammal. Ŝi faris gravajn kontribuojn al citogenetiko kaj geobotaniko. Ŝia plej rimarkinda scienca laboro rilatas al sukerkano kaj melongeno.

5-a de Novembro 1900. Naskiĝas iĥtiologo Ethelwynn Trewavas. Ŝi estas konata pro sia laboro pri la familioj Cichlidae kaj Sciaenidae.

6-a de Novembro 1950. Naskiĝas matematikisto Amir Aczel. Li skribis pri la historio de scienco kaj matematiko. Lia plej konata libro estas La Lasta Teoremo de Fermat.

7-a de Novembro 994. Naskiĝas la alandalusa intelektulo Ibn Hazm. Li verkis 400 volumojn pri genealogio, teologio, historio, juro kaj medicino. La kolombo-kolĉeno, pri amo kaj amantoj, estas lia ĉefverko.

8-a de Novembro 1887. La inventisto Emile Berliner patentas la gramofonon. Inter liaj atingoj estas ankaŭ la evoluigo de vinildiskoj kaj la antaŭaĵo de la mikrofono.

9-a de Novembro 1934. Naskiĝas astrofizikisto kaj verkisto Carl Sagan. Li faris grandan kontribuon al la diskonigo kaj popularigo de scienco. Plej konata estas lia televidserio Cosmos.

10-a de Novembro 1869. Naskiĝas historiisto kaj arabisto Andrés Giménez Soler. Liaj verkoj daŭre estas referencoj por la studo de la nazaria Granada reĝlando.

11-a de Novembro 1942. Naskiĝas onkologo Robert A. Weinberg. Li priskribis la unuan onkogenon (Ras) kaj la unuan genon forigantan tumorojn (Rb).

12-a de Novembro 2015. Teamo de la usona Masaĉuseca Instituto de Teknologio (MIT) inventas novan proceduron por sensaligi akvon uzante ŝokondojn.

13-a de Novembro 1891. Naskiĝas geologo Hedwig T. Kniker. Ŝi studis la Kretaceon kaj Terciaron, kaj ankaŭ la Permiajn fusilinidojn kaj ties stratigrafian gravecon.

14-a de Novembro 1830. Naskiĝas arabisto Emilio Lafuente Alcántara. Lia studaĵo Arabaj Surskriboj de Granado inkludas tradukojn kaj interpretojn de tekstoj en la filigranoj de la Alhambro (Granado, Hispanio).

15-a de Novembro 2016. La IGME (Instituto pri Geologio kaj Minindustrio de Hispanio) prezentas al la publiko la plej grandan potencialan kuŝejon de teluro en la mondo, situantan en la sudokcidento de la Kanariaj insuloj. Ili estis studintaj la mineralojn de la submaraj montoj de la insuloj ekde 2011.

16-a de Novembro 2004. La Fondaĵo Ørskov estas kreita por subteni esploradon en novigaj kaj daŭrigeblaj metodoj por plibonigi brutar-bredadon kaj manĝaĵproduktadon. Ĝi omaĝas la esploriston Bob Ørskov.

17-a de Novembro 1935. Forpasas kuracisto Matilda Evans. Ŝi pledis por pli bona sanservo por nigruloj en Usono, precipe geinfanoj.

18-a de Novembro 1917. Naskiĝas fizikisto Carolyn Beatrice Parker. Dum la periodo 1943-1947 ŝi laboris pri la Dayton-projekto, la branĉo de la Projekto Manhattan por esplori kaj evoluigi plutonion.

19-a de Novembro 1901. Naskiĝas matematikisto Nina Karlovna Bari. Ŝi estas konata pro sia laboro pri trigonometriaj serioj.

20-a de Novembro 1889. Naskiĝas astronomo Edwin Hubble. La kosmoteleskopo Hubble estis tiel nomita honore al li.

21-a de Novembro 1935. La kemiisto Branca Edmée Marques de Sousa Torres defendas sian doktoran tezon pri bario ĉe la Universitato Sorbono. Ŝiaj direktoroj estis Marie Curie kaj André-Louis Debierne.

22-a de Novembro 1859. Naskiĝas kuracisto kaj profesoro Cecilia Grierson. Ŝi estis la unua virino akirinta medicinan diplomon en Argentino. Ŝi fondis la Nacian Obstetrikan Unuiĝon kaj la Obstetrikan Revuon.

23-a de Novembro 1898. Naskiĝas kemiisto Rachel Fuller Brown. Kun Elizabeth Lee Hazen, ŝi kreis la unuan fungicidon por homoj: nistatino, kontraŭ infektoj pro la fungoj Candida albicans kaj Cryptococcus.

24-a de Novembro 1846. Naskiĝas arkeologo kaj historiisto Percy Gardner. Fakulo pri numismatiko, li montris kiel moneroj montras la historion kaj arton de siaj tempoj.

25-a de Novembro 1964. Martin Cole kaj kunlaborantoj patentas metodon biologian (per enzimoj) por prepari penicilinojn en pli daŭripova maniero, evitante la produktadon de miloj da tunoj da kemia rubo kaj ŝparante energion.

26-a de Novembro 1783. La aeronaŭto Louis-Sebastien Lenormand faras la unuan dokumentitan eksperimenton pri paraŝutado.

27-a de Novembro 1852. Forpasas la matematikisto, informadikisto kaj verkisto Ada Lovelace. Ŝi estas konsiderata kiel la unua ina komputilprogramisto de la mondo.

28-a de Novembro 1660. Oni fondas en Londono la Reĝan Societon, la plej malnovan sciencan societon en Britio kaj unu el la unuaj en Eŭropo, dediĉitan al stimulado de eminenteco en scienco.

29-a de Novembro 1893. Naskiĝas la kuracisto kaj farmacia esploristo María Orosa e Ylagan. Ŝi fakiĝis pri manĝteknologio kaj evoluigis produktojn kiel ekzemple soyalac kaj darak.

30-a de Novembro 1942. Naskiĝas María Ángeles Durán, esploristino faka pri la analizo de la sensalajra laboro kaj ĝia rilato kun la socia kaj ekonomia strukturo.

1-a de Decembro 2010. Esploristoj de la Universitato de Sevilo (Hispanio) Cristina Sánchez-Porro kaj Antonio Ventosa publikigas la malkovron de nova mikroorganismo kiu kreskas en la restaĵoj de la ŝipo Titanic.

2-a de Decembro 1950. Isaac Asimov publikigas Mi, Roboto. Ĉi tiuj rakontoj baziĝas sur la tri leĝoj de robotiko, morala kodo por gvidi la rilaton inter robotoj kaj homoj.

3-a de Decembro 1842. Naskiĝas entomologo Margaretta Morris. Ŝi priskribis la cikadon Magicicada cassinii kaj studis la tritikajn muŝojn, la akridojn kaj la fungojn kiel botanikajn plagojn. Ŝia laboro plibonigis agrikulturon.

4-a de Decembro 1973. La kosmoŝipo Pioneer 10 flugas proksime al Jupitero kaj fotas ĝian atmosferon kaj tri el ĝiaj satelitoj (Eŭropo, Ganimedo kaj Kalisto). Ĝi estis la unua kosmoŝipo kiu vojaĝis ekster la sunsistemo.

5-a de Decembro 1895. Naskiĝas matematikisto Elbert Frank Cox. Li estis la unua nigrulo en Usono kiu atingis doktoriĝon pri matematiko.

6-a de Decembro 1909. Naskiĝas kemiisto María de la Concepción Carnero Valenzuela. Kune kun la biokemiisto Fernando Calvet, ŝi studis dioksinojn, kemiajn komponaĵojn kiuj iĝas persistaj mediaj poluaĵoj.

7-a de Decembro 1823. Naskiĝas matematikisto kaj logikisto Leopold Kronecker. Li estis konvinkita, ke aritmetiko kaj analizo devas baziĝi sur la entjeraj nombroj.

8-a de Decembro 1919. Naskiĝas informadikisto Katerina Juŝĉenko. Ŝi laboris pri teorio pri probablo, algoritmaj lingvoj kaj programlingvoj. Ŝi evoluigis altnivelan lingvon, la Adresitan Programlingvon.

9-a de Decembro 1931. Naskiĝas biokemiisto kaj medi-biologo Fawzia Fahim. Ŝi estas ĉefe konata pro sia laboro pri la kontraŭtumoraj efikoj de serpentveneno.

10-a de Decembro 2017. Teamo gvidita de la IGME (Instituto pri Geologio kaj Minindustrio de Hispanio) kaj la Universitato de Oksfordo malkovras novan iksodon (Cornupalpatum burmanicum) en plumo de dinosaŭro. Ĝi estas la unua rekta pruvo de ĉi tiu parazitado.

11-a de Decembro 1843. Naskiĝas Robert Koch. Li malkovris la bacilojn de tuberkulozo kaj ĥolero. Li estas konsiderata la fondinto de moderna bakteriologio.

12-a de Decembro 1913. Naskiĝas matematikisto Emma Castelnuovo. Fakulo pri matematika edukado, ŝi realigis novigan laboron pri la didaktika aliro de tiu ĉi fako.

13-a de Decembro 1465. La kuracisto kaj komercisto Abd al-Basit al-Malati elŝipiĝis en Malago por pluigi siajn medicinstudojn en Alandaluso. Li skribis pri siaj spertoj kaj perceptoj pri la alandalusa teritorio.

14-a de Decembro 1916. Naskiĝas geologo Concepción Bonet Muñoz. Ŝi kreis la Fakon de Fotogeologio en la hispana Buroo de Nuklea Energio (nun CIEMAT) kaj partoprenis en la evoluigo de la Ĝenerala Ŝosea Plano por Hispanio.

15-a de Decembro 1970. La sondilo Venera 7 eniras la atmosferon de Venuso kaj alteriĝas sur la surfacon de la planedo.

16-a de Decembro 1878. Naskiĝas kemiisto Gertrud Woker. Ŝi montris la toksecon de plumba benzino kaj sugestis kiel produkti senplumban fuelon. Ŝi studis la efikojn de venenaj gasoj uzitaj dum la milito.

17-a de Decembro 1903. Mekanikistoj fratoj Orville kaj Wilbur Wright por la unua fojo flugas per sia motora aviadilo. Ili kovras distancon de 40 metroj en 12 sekundoj.

18-a de Decembro 1994. La kaverno de Chauvet (Ardèche, Francio) estas malkovrita. Ĝi enhavas kelkajn el la plej malnovaj kavernpentraĵoj konataj.

19-a de Decembro 2013. Oni lanĉas en la kosmon Gaia, la teleskopon de la Eŭropa Kosma Agentejo (ESA, laŭ ĝiaj komencliteroj en la angla).

20-a de Decembro 1890. Naskiĝas kemiisto kaj inventisto Jaroslav Heyrovský. Li ricevis la nobelpremion pri Kemio pro la eltrovo kaj evoluigo de polarografaj analizmetodoj.

21-a de Decembro 1922. Naskiĝas fizikisto kaj matematikisto Cécile DeWitt-Morette. Ŝi gvidis ekspedicion al Maŭritanio kun sia edzo por konfirmi ke la trajektorio de lumo kurbiĝas laŭ la teorio de ĝenerala relativeco.

22-a de Decembro 1887. Naskiĝas memlerna matematikisto Srinivāsa Aiyangār Rāmānujan. Lia konjekto pri la taŭ-funkcio malfermis novajn esplorliniojn.

23-a de Decembro 1912. Naskiĝas organik-kemiisto Anna Jane Harrison. Ŝi studis toksajn fumojn dum la Dua Mondmilito kaj kontribuis al esplorado pri ultraviola lumo.

24-a de Decembro 2013. Reĝino Elizabeto la 2-a de Britio forigas la iamajn kulpigojn al matematikisto Alan Turing (1912-1954) pri publika maldececo pro havi samsekseman rilaton. Turing estas unu el la antaŭuloj de moderna komputiko.

25-a de Decembro 2020. Oni eltrovas ritan deponaĵon kun du prahistoriaj bronzaj kaskoj en kaverno en Cueves (Asturio, Hispanio). Kvankam ĉi tiaj kaskoj estas vaste reprezentitaj en artaj bildoj, ili estas tre malofte troveblaj.

26-a de Decembro 1990. Forpasas la agronoma inĝeniero Robert Jarrige. Liaj libroj pri principoj de nutrado de remaĉuloj estas bonegaj referencoj por esplorado kaj kamplaboro en ĉi tiuj fakoj.

27-a de Decembro 1903. Naskiĝas farmaciisto Edith Bülbring. Ŝi esploris la fiziologion de la glata muskolo.

28-a de Decembro 1895. Wilhelm Röntgen publikigas la malkovron de iksoradioj. Li ne patentis ilin tiel ke la socio povu profiti senpage. Li ankaŭ ne volis, ke ili portu lian nomon.

29-a de Decembro 1888. Isaac Roberts fotas la Grandan Andromedan Nebulozon (jarojn poste, Hubble pruvos ke ĝi estas galaksio).

30-a de Decembro 1837. Naskiĝas muzikhistoriisto Marie Lipsius, konata kiel La Mara. Ŝi publikigis multajn biografiojn de muzikistoj kaj eldonis la korespondaĵon de Franz Liszt.

31-a de Decembro 1975. Oni malkovras la asteroidon 1975 YD. La Internacia Astronomia Unio renomis ĝin kiel Anadiego omaĝe al Ana Teresa Diego, studento pri astronomio arestita kaj murdita dum la argentina diktaturo kiu komenciĝis en 1976.

1-a de Januaro 1769. Naskiĝas akuŝistino Marie-Louise Lachapelle. Ŝi estis direktoro de obstetriko ĉe la Hôtel-Dieu, la plej malnova hospitalo en Parizo. Pro sia instruado, ŝi estas konsiderata la patrino de moderna obstetriko.

2-a de Januaro 1972. Mortas inĝeniero Lillian Moller Gilbreth. Efikecfakulo, ŝi kontribuis al la studo de industria inĝenierado en kampoj kiel ekzemple movo kaj homaj faktoroj.

3-a de Januaro 1873. Naskiĝas botanikisto Mary Strong Clemens. Ŝi diligente kolektis flaŭrajn specimenojn dum sia vivo en malproksimaj areoj de Filipinoj, Borneo, Ĉinio, Aŭstralio kaj Nov-Gvineo.

4-a de Januaro 1883. Naskiĝas fitopatologo Johanna Westerdijk. Inter aliaj, ŝi respondecis pri konservado de la kolekto de proksimume 80 fungokulturoj de la Internacia Asocio de Botanikistoj.

5-a de Januaro 1943. Mortas agronomo kaj botanikisto George Washington Carver. Li ĉerpis pli ol 300 produktojn el la arakido por nutrada kaj industria uzo.

6-a de Januaro 1875. Naskiĝas mikrobiologo kaj nutradisto Harriette Chick. Kune kun Elsie Dalyell, ŝi malkovris la nutran faktoron kiu kaŭzas rakiton kaj montris kiel kuraci kaj eviti ĝin.

7-a de Januaro 1894. Inventisto William K. L. Dickson ricevas patenton por kina filmo kun movo. En 1895 li fondis la Biograph Company, unu el la plej produktivaj filmstudioj de ĝia tempo.

8-a de Januaro 1927. Naskiĝas aerospaca fizikisto kaj inventisto Virginia Tower Norwood. Ŝi kontribuis al la Landsat-programo, dizajnante la mult-spektran skanilon, unue uzitan sur Landsat 1.

9-a de Januaro 1869. Naskiĝas kemiisto Richard Wilhelm Heinrich Abegg. Li estis la unua esploristo kiu asertis ke kemia valento rilatas al elektrona strukturo.

10-a de Januaro 1729. Naskiĝas la natursciencisto Lazzaro Spallanzani. Li estis pasia pri la studo de digestado, pruvante ke ĝi estas procezo kemia kaj ne mekanika, kiel oni kredis ĝis tiam.

11-a de Januaro 1892. Naskiĝas entomologo kaj scienca ilustristo Doris Holmes Blake. Ŝi estis fakulo pri krisomelidoj (foliskaraboj).

12-a de Januaro 1917. Naskiĝas statistikisto Stella Vivian Cunliffe. Ŝi estis la unua virino kiu prezidis la Reĝan Statistikan Societon de Britio.

13-a de Januaro 1913. Naskiĝas konstruinĝeniero Enedina Alves Marques. Ŝi laboris pri la uzo de akvo de la riveroj Capivari, Cachoeira kaj Iguazú kaj konstruis la hidroelektran centralon Capivari-Cachoeira (Brazilo).

14-a de Januaro 1901. Naskiĝas la logikisto Alfred Tarski. Tiun saman tagon, sed en 1978, mortis la ankaŭ logikisto Kurt Gödel. Kiel omaĝo al ili, la 14-a de januaro estas la Monda Tago de Logiko.

15-a de Januaro 2001. Oficiale naskiĝas Vikipedio, libera kaj poliglota enciklopedio, kiu estas kunlabore redaktata. Ĝi estas administrata de la Fondaĵo Vikimedio, neprofitcela organizaĵo.

16-a de Januaro 2009. Estas inaŭgurita la Universitata Hospitalo Río Hortega de Valadolido (Hispanio). Ĝia nomo honoras la figuron de la neŭrobiologo Pío del Río Hortega, kies kariero kaj rekono estis malhelpitaj de lia malkaŝa samseksemo.

17-a de Januaro 1624. Naskiĝas la matematikisto, verkisto kaj arkitekto Guarino Guarini. Li verkis serion de matematikaj libroj, inkluzive de Euclides adauctus, unu el la unuaj disertaĵoj pri priskriba geometrio.

18-a de Januaro 1779. Naskiĝas fizikisto, matematikisto, kuracisto, filologo kaj vortaristo Peter Mark Roget. Li studis la persiston de la retino, kio estis la origino de la movbilda filmarto. Li publikigis la Thesaurus of English Words and Phrases.

19-a de Januaro 1904. Naskiĝas kemiisto Lucy Weston Pickett. Ŝi estas konata pro siaj esploroj de organikaj molekuloj per ikso-radia kristalografio kaj ultraviola sorba spektroskopio.

20-a de Januaro 1943. Naskiĝas kardiologo Valentín Fuster. Li publikigis multajn studojn pri malsanoj de la kora arterio, arteriosklerozo kaj trombozo. En 1996 li ricevis la Premion Princo de Asturio.

21-a de Januaro 1935. Naskiĝas ŝipa inĝeniero Raye Jean Montague. Ŝi kreis la unuan perkomputilan dezajn-sistemon por armeaj ŝipoj, kaj tiel ŝi radikale ŝanĝis la manieron kiel ili estis produktitaj kaj uzitaj.

22-a de Januaro 1855. Naskiĝas kuracisto Albert Neisser. Li malkovris la bakterion Neisseria gonorrhoeae, kaŭzantan agenton de gonoreo, sekse kontaĝata infekto.

23-a de Januaro 1909. Naskiĝas arkeologo Tatiana Proskouriakof. Ŝi kontribuis al deĉifrado de majaa skribo kaj proponis sistemon por dati monumentojn, bazitan sur la morfologio kaj skulpta stilo de la pecoj.

24-a de Januaro 1809. Naskiĝas Mariano de la Paz Graells, unu el la plej elstaraj hispanaj sciencistoj de la 19-a jarcento. Li direktis la Nacian Muzeon de Natursciencoj kaj entreprenis valorajn projektojn en aplikata zoologio.

25-a de Januaro 1867. Naskiĝas kuracisto Adelaide Cabete. Ŝi edukis aliajn virinojn pri infanprizorgado kaj virina higieno, kaj instigis la malfermon de akuŝhospitaloj.

26-a de Januaro 1886. Naskiĝas kuracisto Fidel Pagés, pioniro en la disvolvigo de epidurala anestezo. Pro lia frua morto kaj ĉar lia laboro ne estis tradukita, liaj eltrovaĵoj estis nekonataj dum jaroj.

27-a de Januaro 1902. Naskiĝas astronomo Margaret Walton Mayall. Ŝi laboris pri fotometrio kaj spektraj klasoj de variaj steloj. Ŝi ankaŭ gvidis la usonan Asocion de Observantoj de variaj steloj.

28-a de Januaro 1540. Naskiĝas matematikisto Ludolph van Ceulen. Elstara kalkulisto, li estas konata ĉefe pro tio, ke li proksimigis la valoron de la nombro pi al 35 precizaj decimalaj lokoj.

29-a de Januaro 1881. Naskiĝas mikrobiologo Alice C. Evans. Ŝi malkovris la kontaĝo-mekanismon de brucelozo, rekomendante la pasteŭrizadon de bovina lakto por eviti ĉi tiun malsanon.

30-a de Januaro 2019. En la Reĝa Akademio de Ekzaktaj, Fizikaj kaj Naturaj Sciencoj de Hispanio, okazas omaĝo al sep sciencistoj, kiuj suferis subpremadon dum la Franco-diktaturo, redonante al ili ilian akademian diplomon.

31-a de Januaro 1961. La ĉimpanzo Ham pilotas testmision de la projekto Mercury. Ĝi tiel iĝis la unua homedo kiu atingis la kosman spacon.

1-a de Februaro 1851. Naskiĝas la bakteriologo Jaime Ferrán. Li evoluigis pioniran vakcinon kontraŭ ĥolero. Ĝia uzo estis tre polemika kaj daŭris 20 jarojn por ke Ferrán estu tutmonde agnoskita pro ĝi.

2-a de Februaro 1922. Naskiĝas sciencisto Albert Schatz. Kune kun Selman Waksman, li malkovris la aminoglikozidon streptomicino, antibiotikon izolitan el la bakterio Streptomyces griseus.

3-a de Februaro 1931. Naskiĝas Olga M. Kozhova. Ŝi estas konata pro siaj esploroj pri hidrologio kaj ekologio de lago Bajkalo. Ŝi ankaŭ studis homajn agadojn, kiuj minacas ĉi tiun lagan ekosistemon.

4-a de Februaro 1929. Naskiĝas la programisto Mary Coombs. Ŝi estis la unua virino kiu laboris pri la komputilo LEO, la unua komputilo en historio destinita por komerco.

5-a de Februaro 1918. Naskiĝas la matematikisto kaj historiisto de matematiko Cecily Tanner. Post komenca esplorado de integrado, ŝi dediĉis sin ĉefe al historio kaj edukado pri matematiko.

6-a de Februaro 1996. Britio transdonas esplorbazon en Antarkto al Ukrainio. Ĝi estas nomata Akademik Vernadsky kaj situas sur ekstremo de Insulo Galíndez (Insularo Wilhelm).

7-a de Februaro 1871. Naskiĝas bakteriologo Kiyoshi Shiga. Li malkovris la bakterion Shigella dysenteriae, kiu kaŭzas infektan disenterion, kaj evoluigis efikan serumon por trakti ĉi tiun malsanon.

8-a de Februaro 1831. Naskiĝas flegisto kaj kuracisto Rebecca Lee Crumpler. Spitante la tiamajn antaŭjuĝojn, ŝi iĝis la unua afrikusona virino kiu akiris medicinan diplomon en 1864.

9-a de Februaro 1892. Naskiĝas akva ekologo kaj zoologo Minna Jewell. Ŝi estas konata pro sia esplorado pri dolĉakvaj spongoj.

10-a de Februaro 1842. Naskiĝas astronomo Agnes Mary Clerke. Ŝi atingis tutmondan famon en 1885 per la publikigo de sia ĝisfunda traktaĵo Popola historio de Astronomio dum la deknaŭa jarcento.

11-a de Februaro 2005. Forpasas matematikisto kaj inĝeniero Mary W. Jackson. Ŝi estis la unua nigrula inĝenierino de NASA kaj laboris por influi kaj la dungadon kaj rangaltigon de virinoj en tiu institucio.

12-a de Februaro 1819. Forpasas la kuracisto Francisco Javier Balmis. Li gvidis la Reĝan Filantropian Ekspedicion por disvastigi la variolvakcinon en Ameriko kaj Filipinoj.

13-a de Februaro 1913. Naskiĝas virologo Marguerite Vogt. Ŝi estas plej konata pro sia esplorado pri poliomjelito kaj kancero ĉe la Salk-Instituto por Biologiaj Studoj.

14-a de Februaro 2003. Mortas la ŝafino Dolly. En 1996 ĝi iĝis la unua mamulo klonita el plenkreskula ĉelo.

15-a de Februaro 1564. Naskiĝas Galileo Galilei. Liaj atingoj inkludas la plibonigon de la teleskopo, vastan gamon de astronomiaj observaĵoj kaj la unuan leĝon de moviĝo.

16-a de Februaro 1514. Naskiĝas Georg Joachim Rheticus , matematikisto, astronomo, teologo, kartografo, fabrikisto de muzikiloj kaj kuracisto. Li estis disĉiplo de Koperniko.

17-a de Februaro 1928. Naskiĝas virologo Michiaki Takahashi. Li evoluigis la unuan vakcinon kontraŭ varicelo. Ĝi estis tre malfacila esploro uzanta malfortigitan vivan kultivaĵon de la varicel-zostera viruso.

18-a de Februaro 1877. Naskiĝas Alice Grace Cook, brita astronomo konata pro siaj observaĵoj de meteoritoj kaj la eltrovo de la novao V603 Aquilae.

19-a de Februaro 1955. Mendelevio estas unuafoje sintezita en la Universitato de Kalifornio ĉe Berkeley (Usono). Ĝia nomo memorigas pri la kemiisto Dmitri Mendelejev, baza figuro por la kreado de la perioda tabelo.

20-a de Februaro 1902. Naskiĝas fizikisto Katharine Way. Ŝi estis parto de la teamo de la Manhatan-projekto, por kiu ŝi laboris pri la dezajno de reaktoroj kaj la prilaborado de datumoj akiritaj en radioaktivaj procezoj.

21-a de Februaro 1962. Forpasas Julio Rey Pastor. Li esploris algebran geometrion kaj projekcian geometrion, iĝante unu el la plej signifaj matematikistoj de sia tempo en Eŭropo.

22-a de Februaro 1796. Naskiĝas Adolphe Quetelet. Li aplikis la statistikan metodon al sociologio kaj inventis la korpan masindekson, kiu estas ankoraŭ uzata hodiaŭ por determini obezecon.

23-a de Februaro 1924. Naskiĝas fizikisto Allan McLeod Cormack. En 1979 li ricevis Nobel-premion, kune kun inĝeniero Godfrey Newbold Hounsfield, pro la evoluigo de komputila tomografio.

24-a de Februaro 1827. Naskiĝas Lydia Becker, defendanto de virina voĉdonrajto kaj amatora sciencisto. Ŝi studis botanikon kaj ankaŭ interesiĝis pri astronomio, kaj ŝi korespondadis kun Charles Darwin.

25-a de Februaro 1925. Naskiĝas biokemiisto Ruth Benesch. Ŝi kaj ŝia edzo malkovris specialan specon de fosfora komponaĵo, 2,3-bisfosfoglicerata acido, ligo inter hemoglobino kaj oksigeno.

26-a de Februaro 1815. Forpasas la matematikisto Agustín de Pedrayes. Li reprezentis Hispanion en la evoluigo de la metra sistemo de pezoj kaj mezuroj.

27-a de Februaro 2011. Oni celebras la unuan Internacian Tagon de la Blanka Urso por atentigi pri la malfacilaĵoj, kiujn ĉi tiu specio alfrontas pro la varmiĝo de la Arkto.

28-a de Februaro 1863. Naskiĝas la kuracisto Gheorghe Marinescu. Li estas konata kiel la fondinto de la rumana skolo de neŭrologio. Lia monumenta verko La Nerva Ĉelo estis prologita de Santiago Ramón y Cajal.

29-a de Februaro 2008. Unua Eŭropa Tago de Maloftaj Malsanoj. Ĝia celo estas konsciigi pri malsanoj kiuj, pro sia escepta naturo, estas nevideblaj por granda parto de la loĝantaro.

1-a de Marto 1955. Naskiĝas kemiisto Gregory Hillhouse. Li esploris organometalajn komponaĵojn kun transirmetaloj kaj montris, ekzemple, ke nikelo kreas ligojn kun elementoj kiel ekzemple nitrogeno.

2-a de Marto 1972. Donella Meadows kaj ŝiaj kunlaborantoj publikigas la raporton La limoj de kreskado, en kiu ili avertas pri la limoj de la planedo por subteni ekonomian kaj loĝantaran kreskon.

3-a de Marto 1924. Naskiĝas Ruth Hubbard. Dum sia esplorkariero ŝi faris gravajn kontribuojn al la kompreno de la biokemio kaj fotokemio de vidado en vertebruloj kaj senvertebruloj.

4-a de Marto 1877. Naskiĝas inventisto Garrett Augustus Morgan. Li redezajnis la gasmaskon por eviti gasenspirojn fare de fajrobrigadistoj kaj patentis la aŭtomatan trafiklumon kun avertlumo.

5-a de Marto 1885. Naskiĝas patologo Louise Pearce. Ŝi partoprenis en la evoluigo de medikamento por trakti dormomalsanon (afrikan tripanosomozon). Ĝi estis la referenca kuracilo ĝis la 60-aj jaroj.

6-a de Marto 1665. La unua numero de Philosophical Transactions of the Royal Society estas publikigita en Londono. Ĝi estas konsiderata la unua scienca revuo en la mondo kaj daŭre aktivas hodiaŭ.

7-a de Marto 1912. Norvega esploristo Roald Amundsen anoncas la malkovron de la suda poluso.

8-a de Marto 1820. Ferdinando la 7-a malfondas la Hispanan Inkvizicion. Tiu ĉi religia institucio dum jarcentoj limigis la progreson de la scienco, cenzurante librojn kaj persekutante teoriojn kontraŭajn al sia kredo.

9-a de Marto 1934. Naskiĝas kosmonaŭto Jurij Gagarin. En 1961 li iĝis la unua persono kiu vojaĝis al kosma spaco.

10-a de Marto 1961. Naskiĝas la aeronaŭtika kirurgo Laurel Blair Salton Clark. Ŝi mortis en la akcidento de la kosmopramo Columbia dum ĝia reeniro en la atmosferon.

11-a de Marto 1911. Mortas la astronomo, matematikisto kaj inĝeniero Julio Garavito Armero. Lia esplorado estis decida por la evoluo de scienco en Kolombio. Lunkratero estas nomata laŭ li ekde 1970.

12-a de Marto 1824. Naskiĝas fizikisto Gustav Robert Kirchhoff. Li kontribuis al la studo de elektraj cirkvitoj, plattektona teorio, optiko, spektroskopio, kaj nigrakorpa radiada emisio.

13-a de Marto 1946. Naskiĝas evolua ekologo Joan Roughgarden. Ŝi estas konata pro sia esplorado pri kunevoluado kaj seksa selektado. Ŝia plej konata verko estas La ĉielarko de evoluado.

14-a de Marto 1928. Naskiĝas natursciencisto Félix Rodríguez de la Fuente, konata pro la sukcesa televida serio La homo kaj la Tero. Lia pasio kaj karismo influis la adopton de naturprotektaj politikoj.

15-a de Marto 1994. La asteroido 1994 ES1 pasas je 165 000 km de la Tero, preskaŭ duono de la distanco inter nia planedo kaj la Luno. Kun diametro de 28,5 m, ĝi estis detektita nur unu tagon pli frue.

16-a de Marto 1953. Naskiĝas komputilprogramisto Richard Stallman. Li estas konsiderata la fondinto de libera programaro pro la lanĉo, en 1983, de la operaciumo GNU.

17-a de Marto 1993. La biofizikisto Alexandre Quintanilha estas nomumita kiel Granda Oficiro de la Armea Ordeno de Santiago de la Espada. Ĉi tiu portugala medalo rekompencas literaturan, sciencan kaj artan meriton.

18-a de Marto 1910. En Madrido estas kreita la Centro por Historiaj Studoj, unu el la institucioj de la Junta para Ampliación de Estudios (Konsilio por Ampleksigo de Studado). Unu el ĝiaj plej gloraj direktoroj estis Ramón Menéndez Pidal.

19-a de Marto 1943. Naskiĝas kemia inĝeniero kaj nobelpremiito Mario Molina. Li estis unu el la homoj kiuj malkovris la kaŭzojn de la truo en la antarkta ozontavolo.

20-a de Marto 1890. Naskiĝas nuklea fizikisto Elizabeth Rona. Ŝi estas konata pro sia laboro kun radioaktivaj izotopoj.

21-a de Marto 1994. La Kadra Konvencio de Unuiĝintaj Nacioj pri Klimata Ŝanĝiĝo ekvalidas. Ĝi estas ratifita de proksimume 200 landoj.

22-a de Marto 1938. Naskiĝas fizikisto Alejandra Jáidar. Ŝia esplorado temis pri kiel apliki metodojn kaj teknikojn de nuklea fiziko kiel analizajn ilojn en aliaj kampoj de fiziko.

23-a de Marto 1749. Naskiĝas Pierre Simon Laplace, unu el la grandaj sciencistoj de la Klerismo. Li pruvis ke la planedaj movoj estas stabilaj kaj metis la fundamentojn por la matematika teorio de probableco.

24-a de Marto 1934. Naskiĝas esploristo pri bestnutrado Egil Robert Ørskov. Li estas rekonita pro siaj kontribuoj en la kampo de energia kaj proteina metabolo en remaĉbrutaro.

25-a de Marto 1878. Naskiĝas krimpatologo Frances Glessner Lee. Ŝi revoluciigis la studon de kriminologio per dioramoj nomitaj Simplaj scenejoj de neklarigitaj mortoj.

26-a de Marto 1926. Naskiĝas matematikisto Magdalena Mouján Otaño. Ŝi estis parto de la Nacia Atomenergia Komisiono de Argentino kaj estis unu el la unuaj homoj kiuj laboris per la komputilo Clementina.

27-a de Marto 1913. Naskiĝas genetikisto kaj evolua biologo Raissa L’vovna Berg. Inter aliaj, ŝi studis heredajn karakterojn en Drosophila melanogaster kaj la populacigenetikon de heredaj malsanoj.

28-a de Marto 1895. La fratoj Lumiére prezentas al la publiko en Parizo (Francio) sian inventon nomatan kinematografo.

29-a de Marto 1958. Naskiĝas ekonomikisto Nouriel Roubini. Li estas konata pro siaj prognozoj pri la financa krizo de la hipotekoj subkvalitaj (subprime). Kvankam li estis akuzita esti pesimisto, liaj prognozoj estis precizaj.

30-a de Marto 2010. La Granda Hadrona Koliziilo (LHC) sukcesas koliziigi partiklojn je 7 teraelektronvoltoj (TeV). Ĝi estis la plej alta energio atingita en akcelilo, tiel imitante la Praeksplodon.

31-a de Marto 1076. Naskiĝas la islama juristo Abu Bakr Ibn al-Arabi. Li skribis multajn verkojn pri teologio kaj juro, per kiuj li disvastigis la juran scion el la Oriento siatempe.

1-a de Aprilo 1806. Naskiĝas mar-zoologo Anna Thynne. Ŝi konstruis la unuan ekvilibran maran akvarion. Ĝi rolis kiel la inspiro por la Fiŝdomo de la londona bestoparko, la unua publika akvario de la mondo.

2-a de Aprilo 1851. La kemiisto Antonio Casares sukcesas produkti elektran lumon unuafoje en Hispanio. Tion li faris en la klostro de la Universitato de Santiago, uzante elektran arkon.

3-a de Aprilo 1934. Inventisto Percy Shaw registrigas patentopeton por la kat-okula surpavima retroreflektilo. Ĉi tiu indikilo faciligas noktan stiradon kaj plibonigas vojsekurecon.

4-a de Aprilo 1930. Naskiĝas marbiologo Shirley Winifred Jeffrey. Ŝi estis pioniro en la evoluigo de kemiaj metodoj por karakterizi pigmentojn kaj apliki ilin al la studo de fitoplanktono. Ŝi malkovris c-klorofilon.

5-a de Aprilo 1949. Naskiĝas inĝeniero kaj astronaŭto Judith Resnik. Ŝi laboris en elektra kaj softvara inĝenierio, ankaŭ kontribuante per esplorado pri biomedicina inĝenierio.

6-a de Aprilo 1869. La projekto por la kreado de la Usona Muzeo de Naturhistorio de Novjorko estas subskribita. Ĝi estas unu el la plej grandaj sciencaj muzeoj en la mondo, kun pli ol 32 milionoj da specimenoj.

7-a de Aprilo 1969. Inĝeniero Steve Crocker – de la Universitato de Kalifornio ĉe Los-Anĝeleso (UCLA) – publikigas la dokumenton Host Software, konsideratan la deirpunkto de tio, kio hodiaŭ estas la Interreto.

8-a de Aprilo 1883. Naskiĝas bakteriologo Muriel Robertson. Ŝi montris, ke la parazito Trypanosoma gambiense, kiu kaŭzas dormomalsanon, ŝanĝas sian proteinan ŝelon, kio tre malfaciligas la kreadon de vakcinoj.

9-a de Aprilo 1869. Naskiĝas matematikisto Élie Joseph Cartan. Li laboris pri Lie-grupteorio kaj ĝiaj geometriaj uzoj. Li faris kontribuojn al matematika fiziko, diferenciala geometrio kaj teorio de grupoj.

10-a de Aprilo 2019. La teamo de la teleskopo Event Horizon publikigas la unuan bildon de nigra truo situanta en la centro de la galaksio Messier 87.

11-a de Aprilo 1912. Naskiĝas botanikisto Graziela Maciel Barroso. Konata en Brazilo kiel la Unua Damo de Botaniko, ŝi esploris precipe en la kampo de planta sistematiko.

12-a de Aprilo 1911. Naskiĝas arkitekto Rita Fernández Queimadelos. Ŝi okupis postenojn neniam antaŭe tenitajn de virino en Hispanio, kiel municipa arkitekto aŭ provinca lernejarkitekto.

13-a de Aprilo 1941. Mortas la usona astronomo Annie Jump Cannon. Ŝia kataloga laboro estis fundamenta por la nuna klasifiko de la steloj.

14-a de Aprilo 1899. Naskiĝas la kemiisto Branca Edmée Marques de Sousa Torres. Ŝi defendis sian doktoriĝan tezon pri bario ĉe la Sorbona Universitato en 1935, sub la gvidado de Marie Curie kaj André-Louis Debierne.

15-a de Aprilo 1810. Forpasas biologo Joaquín Fernando Garay de Oca. Li enkondukis kultivadon de terpomo en Hispanio ĉirkaŭ 1793. Li ankaŭ laboris por plibonigi la administradon de agrikulturaj resursoj en la areo de Alto Aragono.

16-a de Aprilo 1728. Naskiĝas kuracisto kaj kemiisto Joseph Black. Li estas konata pro siaj eltrovoj de magnezio, latenta varmo, specifa varmo, kaj karbondioksido.

17-a de Aprilo 1887. Naskiĝas kemiisto Stefanie Horovitz. Dum la unua mondmilito ŝi laboris ĉe la Viena Radiuma Instituto kaj konfirmis la ekziston de izotopoj de elementoj kiel plumbo kaj torio.

18-a de Aprilo 1896. Santiago Ramón y Cajal ricevas la Premion Fauvelle de la Pariza Biologia Societo, unu el liaj multaj internaciaj rekonoj, kiel la Helmholtz Medalo, la Premio Moskvo kaj la Nobel-premio.

19-a de Aprilo 1971. Lanĉo de la unua kosmostacio: Saljut 1. Ĝi restis en orbito dum 175 tagoj, ĝis ĝi preskaŭ elĉerpis fuelon por konservi altecon.

20-a de Aprilo 1973. Naskiĝas fizikisto Montserrat Calleja. Specialisto pri bionanomekaniko, ŝi esploras la mekanikajn trajtojn de ĉeloj kaj ilian rilaton kun kancero kaj ŝi evoluigis nanomekanikajn biosensilojn.

21-a de Aprilo 2012. La Interregistara Platformo pri Biodiverseco kaj Ekosistemaj Servoj (IPBES) estas formale fondita. Inter ĝiaj celoj estas la konservado kaj daŭrigebla uzo de biologia diverseco.

22-a de Aprilo 1970. La Tera Tago estas celebrata unuafoje. Ĝi celas krei komunan konscion pri la problemoj de la planedo, kiel troloĝateco, poluo aŭ tutmonda varmiĝo.

23-a de Aprilo 1924. Naskiĝas komputikisto Maria von Wedemeyer. Ŝi ludis gravan rolon en la evoluigo de la imitad-kapablo en komputado.

24-a de Aprilo 1877. Naskiĝas botanikisto Marie Charlotte Brockmann-Jerosch. Ŝi estas konata pro sia grava esplorado pri alpa flaŭro kaj filogeografio.

25-a de Aprilo 2014. Post 10 jaroj da klopodoj, la sekvencado de la genaro de la cece-muŝo finiĝas. Ĉi tiu muŝo estas la vektoro implikita en la kontaĝo de dormomalsano.

26-a de Aprilo 1896. Naskiĝas aeronaŭtika inĝeniero Sébastienne Guyot. Ŝi kunlaboris en la dezajno kaj konstruado de malgranda dumotora aviadilo en 1924 kaj en la dezajno de fuzelaĝoj kaj karenoj de pluraj hidroplanoj.

27-a de Aprilo 1880. Francis D. Clarke kaj M.G. Foster akiras la patenton por elektra aŭdaparato kiu uzas ostan kondukadon. Tamen, daŭris ĝis 1901 ke la unua komerca aŭdaparato, la Acousticon, estis produktita.